Битиќи: Одлуката за дневната евтина тарифа треба да ја донесе регулаторот, Владата е тука за да ги исполни предусловите

Вицепремиерот за економски прашања Фатмир Битиќи не прецизира кога ќе се врати дневната евтината тарифа на струјата за домаќинствата. Како што изјави денеска, одлуката за тоа треба да ја донесе регулаторот, а Владата е тука за да ги исполни сите неопходни предуслови, пренесува МИА.

„Имавме среќа што со сите капацитети овозможивме да ја поминеме претходната зима солидно добро, независно од големите буџетски издатоци за поддршка на енергетскиот систем и субвенционирање на струјата за домаќинствата и малите потрошувачи. Бидејќи неизвесноста ни претстои, ние внимателно следиме, а одлуката секако е на Регулаторната комисија, не е ниту моја, ниту на некој министер. Ние ќе ги исполниме сите предуслови неопходни за да се врати тоа што сметаме дека граѓаните треба да го имаат. На крај, регулаторот е тој што кажува и за финалната цена, а јас најавив дека не очекувам поскапување и дополнително очекувам дека тоа што сме го најавиле околу евтината тарифа, во првиот момент кога регулаторот ќе каже дека тоа нема да нанесе штета, а секако за граѓаните ќе биде бенефит, тоа да го направиме“, рече Битиќи, одговорајќи на новинарски прашања по отворањето на новиот погон на американската компанија „Теламон“ во Инџиково.

На прашањето дали на Влада поминала цената на струјата со оглед дека до петок е тендерот на ЕВН Хоум, вицепремиерот уште еднаш кажа дека цената се одредува на затворена седница.

Статијата е прочитана 163 пати.

Сподели: