„Технолаб“ ДОО Скопје - 25 години лидер во заштита на животната средина и безбедност при работа

Интервју со Магдалена Трајковска-Трпевска, основач и генерална менаџерка на „Технолаб“ ДОО Скопје, во кое говори за 25-годишниот јубилеј и успешната работа на компанијата која е лидер во заштитата на животната средина, безбедност при работа и лабораториски испитувања во животната и во работната средина. 

...„Во 2008 година го имплементиравме основниот систем за квалитет на лабораториите за тестирање ISO 17025, со што станавме првата акредитирана лабораторија во Република Македонија за вршење на испитувања во животна и работна средина. Секако дека не застанавме тука - усовршувањето и развојот на лабораторијата на “Технолаб“ се одвива континуирано и паралелно и во делот на теренската и во делот на аналитичката лабораторија. Денес, после 25 години посветена работа, со особена гордост може да се пофалиме дека лабораторијата на Технолаб има најголем број на акредитирани методи за тестирање во животна и работна средина и е првата од овој вид за испитувања во животната средина со имплементирани барања на техничката спецификација за мерење на емисија на загадувачки супстанции од стационарни извори МКТС CEN/TS 15675:2009“, вели сопственичката и генерален менаџер на „Технолаб“, Магдалена Трајковска-Трпевска. 

Денес, своите активности „Технолаб“ ги извршува преку следните 4 сектори: Консалтинг во животна средина, Консалтинг за безбедност и здравје при работа, Акредитирана лабораторија за тестирање во животната и работната средина (теренска и аналитичка) и Едукативен тренинг центар.

 МАРИЛИ: Годинава одбележувате 25-годишен јубилеј. Да се навратиме на почетоците. Како почна креирањето на сопствениот бизнис во оваа дејност, колку храброст и претпремачки дух Ви беа потребни во тоа време?

ТРАЈКОВСКА ТРПЕВСКА: Кога се враќам наназад, се потсетувам на многу работи, но сепак морам да истакнам дека заштитата на животната средина и безбедноста при работа станаа моја животна определба уште со моето прво вработување во поранешниот Рударски институт-во секторот за животна средина и безбедност при работа. Мојата работа како хемиски инженер, а подоцна и магистер по хемиски науки, беше насочена пред се кон лабораториските испитувања кои се основа за изработка на квалитетни проекти во делот на заштита и унапредување на воздухот, водите, почвите, работните услови  и безбедноста и здравјето.

Мојата посветеност кон унапредување на квалитетот на животната и работната средина беше основната причина и поттик пред 25 години  да зачекорам по сопствен пат и да формирам своја фирма. Така, во 2000 година ја формирав ТЕХНОЛАБ како приватна компанија со основна дејност работа на проекти од областа на заштита на животната средина и безбедност при работа во чии рамки влезе и сопствената лабораторија за испитување на медиумите и областите на животната и работната средина.  Развојот на Технолаб како компанија ги следеше потребите и барањата на нашите клиенти, но исто така и мојата сопствена визија за компанија која ќе нуди услуги со највисок квалитет согласно меѓународно прифатените стандарди. Имајќи го сето ова во предвид и перцепирајќи ги потребите на пазарот, полни со ентузијазам  започнавме со развој на нашата лабораторија за испитувања во животна и работна средина, со особен акцент на делот за мерење на емисии во воздухот.

Како и секој почеток во сферата на приватниот бизнис, и нашиот не беше ослободен од голем број предизвици, но бевме решени да гледаме само напред, со фокус на иднината. Во текот на петтата година од формирањето, преку имплементацијата на ISO 9001, „Технолаб“ започна со воведување на системите за квалитет во работењето, а оттука произлезе и идејата за дополнително воведување на други системи за квалитет, со кои гарантираме висок перформанс и компетентност во текот на целиот процес на давањето на нашите услуги.

Со многу вложен труд и тенденција за постојан развој, во 2008 година го имплементиравме основниот систем за квалитет на лабораториите за тестирање ISO 17025, со што станавме првата акредитирана лабораторија во Република Македонија за вршење на испитувања во животна и работна средина. Секако дека не застанавме тука - усовршувањето и развојот на лабораторијата на “Технолаб“ се одвива континуирано и паралелно и во делот на теренската и во делот на аналитичката лабораторија.

Денес, после 25 години посветена работа, со особена гордост може да се пофалиме дека лабораторијата на Технолаб има најголем број на акредитирани методи за тестирање во животна и работна средина и е првата од овој вид за испитувања во животната средина со имплементирани барања на техничката спецификација за мерење на емисија на загадувачки супстанции од стационарни извори МКТС CEN/TS 15675:2009.

Паралено работевме на имплементирање на системот за управување со животната средина ISO 14001 и системот за управување со здравје и безбедност при работа OHSAS 18001. Процесот за имплементација на основните системи за квалитет подоцна резултираше со интегриран систем ISO 9001, ISO 14001 и OHSAS.

Основната развојна стратегија на Технолаб е во насока на потврдување и унапредување на квалитетот на услугите кои ги нудиме како компанија - лидер  во областа на заштита на животната средина и заштитата при работа и истата се темели на следниве развојни принципи:

- Развој на ресурсите во смисла на вложувања во квалитетен кадар и вложување во   инфраструктура (работни простории и опрема)

- Развој на методи согласно препораките на националната регулатива и имплементирање на усвоените европски директиви и стандарди во областа на следење на состојбите со квалитетот на животната средина

Следејќи ја ваквата развојна стратегија континуирано вршевме проширување на опсегот на услуги кои ги нудиме со цел адекватно и навремено да одговориме на потребите на нашите клиенти, следејќи ги новите равојни стратегии за унапредување на технологијата во правец на заштита на животната средина.

Ме прашавте и за храброста што е потребна за да се влезе во водите на приватниот бизнис, како и за имањето претприемачки дух. Искрено кажано - потребни се огромни количества од овие две нешта. Во времето во кое јас почнав, пред 2,5 децении, немаше голем број жени кои се успешни во врвниот бизнис, а кои почнале од нула и создале респективни компании.  Доколку ја немав храброста да се втурнам во неизвесноста наречена приватна инвестиција, мислам  дека ќе останев ускратена за една голема успешна приказна - и како професионалец, но и како сопруга и мајка. Секако, овде неизбежна „состојка“ е и претприемачкиот дух, неопходен за секој што сака да стане лидер во својата бранша. Храброста и насоченоста кон претприемништво беа тие што ме водеа низ целиот процес на учење, борба и развој, тие се мои секојдневни придружници, без кои и денес не знам и не сакам да функционирам.

Знаете, ова се особини кои се општочовечки и важат не само за светот на бизнисот, туку и во секојдневните предизвици. На пример, мојата храброст да напуштам сигурна работа и да ризикувам да создадам нешто за кое немав никакви гаранции дека ќе успее, полека се преточуваше и во мојот приватен живот, особено во моментите кога семејството добиваше помал дел од моето време и внимание. И тогаш требаше да се биде храбра и да се решаваат проблемите во еден здив, без многу жалби и критики. За среќа, имам семејство кое е полно со љубов и разбирање, па така сите пречки ги минуваме заедно, поддржувајќи се еден со друг.

МАРИЛИ:  Кои се услуги ги нуди денес „Технолаб“ ?

ТРАЈКОВСКА ТРПЕВСКА:  Своите активности Технолаб ги извршува преку следните 4 сектори: Консалтинг во животна средина, Консалтинг за безбедност и здравје при работа, Акредитирана лабораторија за тестирање во животната и работната средина (теренска и аналитичка) и Едукативен тренинг центар.

Секторот за консалтинг во животна средина изработува:

-   Студиии за влијание врз животната средина

-   Стратегиски оценки на влијание врз животната средина

-    Апликации за добивање дозволи за А и Б еколошки дозволи

-    Елаборати за заштита на животната средина

-    Мониторинг на медиумите во животната средина ( воздух, вода и почва)

-   Изработка на стручни и научни проекти од областа на заштита на животната средина (Катастри на загадувачи на животната средина, Планови за подобрување на квалитетот на медиумите на животната средина, Елаборати за влијанието на домашните ложишта врз квалитетот на амбиентниот воздух и др.)

-    Планови и програми за управување со отпад

Секторот за безбедност при работа нуди услуги за:

- Проценка на ризик на работни места со Изјава за безбедност

- Обука на вработените за безбедност и заштита при работа

- Тестирање и контрола на опрема за работа

- Мерења и анализи на услови во работна средина

- Инспекција и тестирање на заземјување и електрична инсталација

- Изработка на студии (стручни документации) за остварување на право на стаж на осигурување со зголемено траење (бенифициран стаж)

- Проекти и елаборати за безбедност при работа и Планови за безбедност при работа.

Лабораторијата на Технолаб, како неопходна подршка на претходно споменатите сектори е првата акредитирана лабораторија во нашата држава за испитувања на квалитетот на животна и работна средина согласно меѓународниот стандард MKC ISO/IEC 17025:2006. Акредитирана е од 2008 година. Нашата лабораторијата се состои од теренска и аналитичката лабораторија. Компетентните тимови во состав на аналитичката и теренската лабораторија ги вршат следниве услуги:

- Тестирања и анализи во животната и работната средина,

- Мерење и мониторинг на загадувачки супстанции во воздух, вода и почва

- Контрола на квалитет на воздух

- Мерења на услови во работна средина (микроклиматски услови, физички и хемиски штетности)

- Анализи на површински и подземни води

- Категоризација и карактеризација на отпад и отпадна мил

- Испитувања за присуство на ПХБ во воздух, вода, почва и отпадни масла

- Испитување за присуство на БТХ во воздух, вода, почва и одпад.

Во периодот до денес, лабораторијата на Технолаб секоја година позитивно е оценувана од страна на Институтот за акредитација на Република Северна Македонија во текот на редовните годишни надзори. Исто така, во овој период успешно поминавме и четири редовни надзори за ресертификација на нашата лабораторија, а на кои сме  особено горди, и со кои е потврдена компетентноста на нашата лабораторија и на меѓународно ниво. Во лабораторијата на Технолаб имплементирани се над 90 акредитирани методи за испитувања на медиумите и областите на животната средина и испитувања во работна средина. Тестирањата во лабораторијата на Технолаб се извршуваат од страна на компетентен и високо стручен персонал. Истата располага со опрема за земање на мостри и вршење на анализи на медиумите и областите на животната средина која е високо квалитетна и ги следи  најновите технологии во оваа област. Во изминатиот период значитено инвестиравме во нова опрема како во теренската така и во аналитичката  лабораторија. Во рамките на едукативниот тренинг центар, Технолаб нуди стручни обуки од областа на Безбедност и здравје при работа, (БЗР), експертски обуки за стручно оспособување на стручните лица за безбедност при работа и експертски обуки за управување и постапување со отпад.

МАРИЛИ: Главно сте фокусирани кон големите индустриски капацитети. Кои се одликите на вашето работење за да опстанете и бидете успешни и конкуренти долги години во овој сериозен сектор?

ТРАЈКОВСКА ТРПЕВСКА: Индустријата како значаен дел од националната економија е корисник на услугите кои ги нуди Технолаб, но сите компании со кои во изминативе 25 години сме оствариле соработка се еднакво значајни за нас. Наша заложба е на македонските компании согласно нивните потреби и барања да им понудиме достапни услуги преку кои ќе ги исполнат нивните законските обврски кои произлегуваат од законската регулатива за заштита на животната средина и заштитата при работа.  

Притоа, во нашата комуникација со корисниците на нашите услуги секогаш потенцираме дека законската регулатива го дефинира минимумот, но со заедничка соработка секогаш може пропишаниот минимум да се надмине што ќе придонесе до поголем бенифит за сите нас.

Сепак, сите сме дел од она што не опкружува како во животната средина така и во работниот простор. Во изминатиов период сме реализирале успешна соработка со странски инвеститори на проекти во нашата земја од кои дел се веќе реализирани, а реализацијата на дел од нив е во тек.

Нашата професионалност и компетентност при извршувањето на услугите кои ги нудиме се препознаени како од националните компании така и од странските компании кои инвестираат во проекти во нашата земја .

МАРИЛИ: Колку постојаната едукација и надградба за Вас и вашиот тим се важни за следењето на иновации во вашата дејност и колку сте присутни на конференции, едукации, обуки..? Наведете некои од позначјаните едукации во последниот период?

ТРАЈКОВСКА ТРПЕВСКА: Доколку „Технолаб“ не ги следеше сите светски современи текови и стандарди во примената на најновите достигнувања во заштитата на животната средина и безбедноста при работа, немаше повеќе од две децении успешно да опстојува на бизнис сцената, која не трпи импровизации и манипулации.

Така, дури и во претходните кризни години (светската пандемија со Ковид 19, а потоа состојбата со енергетската криза ), наоѓавме начини и можности да инвестираме како во знаење, така и во набавување на нова опрема во лабораториите на Технолаб со цел да остенеме лидер во областа на нашето делување-заштита и унапредување на животната средина и безбедноста при работа.  

Преку присуство на домашни и меѓународни конференции, посета на саеми и онлајн обуки, константно сме во тек со најновите информации и глобални трендови, а знаеме дека денес најважна од се е информираноста.

Според мое лично мислење, нашето општество прави големи напори да држи чекор со поголемите земји во однос на сите промени и нови еколошки предизвици што секојдневно се појавуваат со брзина на светлината. И со право, затоа што животната средина мора да си го добие заслуженото место на листата на приоритети на планетава и затоа што сите ние сме одговорни за тоа како ќе изгледа нашата животна и работна средина.

Всушност, заштитата на животната средина не е само акутен проблем, туку еден долготраен процес, за кој се потребни силни ресурси, висока професионалност и цврста решеност да се истрае тогаш кога силите на природата и не се на ваша страна.

МАРИЛИ: Како функционира вашиот Едукативен тренинг центар, какви обуки нудите и каков кадар ги спроведува предавањата и обуките?

ТРАЈКОВСКА- ТРПЕВСКА: Едукативниот тренинг центар на Технолаб нуди стручни обуки од областа на БЗР, експертски обуки за стручно оспособување на стручните лица за безбедност при работа и експертски обуки за управување и постапување со отпад.

Обуките се спроведуваат од страна на стручен експертски кадар на Технолаб, но наша пракса е, според потребите и темите на обуките,  да ангажираме и надворешни експерти од нашата држава, но и од странство.

МАРИЛИ: Дали последнава деценија се забележува поголема грижа за животната средина кај големите индустриски капацитети, но и кај помалите компании? Дали порасна свесноста за поздрава животна средина?

ТРАЈКОВСКА – ТРПЕВСКА: Мое мислење е дека пристапот, со кој оставаме свесноста да влијае на тоа дали ќе живееме во здрава животна средина или во животна средина која оптеретена со загадување, а влијае на нашиот квалитет на живот, не е ефикасен. Големите индустриски објекти но и помалите компании кои со својата дејност имаат влијание врз животната средина се должни да ја почитуваат законската регулатива од областа на заштита на животната средина која во голем дел е усогласена  со европската регулатива, така што законската рамка постои. Националната законска рамка е поставена на добри основи, но клучно е како да се обезбеди нејзино доследно спроведување. Треба да се стави акцент на механизми со кои ќе се обезбеди доследно спроведување на регулативата, а овие механизми се базираат на редовен мониторинг и контрола. Од мој аспект, повеќе треба да се посветиме на градење на индивидуалната личната свестност за значењето на здравата животна средина бидејќи секако сите ние како индивидуи со нашите секојдневни активности влијаеме на животната средина.

МАРИЛИ: Кое е Вашето согледување и сугестија со оглед на Вашето долгогодишно искуство и експертиза, што треба да се преземе за да се подобри состојбата со заштитата на животната средина?

ТРАЈКОВСКА – ТРПЕВСКА: Заштитата на животната средина е комплексен процес кој вклучува мултидисциплинарен пристап при евалуација на состојбата со животната средина, креирање на ефикасни мерки и политики базирани на спроведената оценка, имплементација на мерките проследена со следење на индикатори за ефикасност на превземените мерки и повторна евалуација по спроведување на мерките.

Ова е континуиран процес чија ефективност зависи од сите инволвирани субјекти. За подобрување на состојбите со животната средина потребно е да се овозможи овој процес непречено и континуирано да се спроведува, за што пак се потребни стручни капацитети, одговорност и посветеност од страна на сите вклучени субјекти. 

МАРИЛИ: Кои се плановите на „Технолаб“ ДОО по 25 -години успешно работење? Во која насока ќе се развивате?

ТРАЈКОВСКА – ТРПЕВСКА: Развојната стратегија на компанијата Технолаб се базира на два клучни сегменти: развој на ресурси и развој на нови методи за лабораториски испитувања на животната и работната средина. Оваа стратегија се покажа како успешна во изминативе 25 години и секако дека и во наредниот период нашите активности ќе ги насочиме во овој правец. Во период на експанзија на модерните технологии исправени сме пред предизвик како истите да ги искористиме за ефикасно управување со постоечките и планираните ресурси. Во наредниот период активно ќе работиме на обновување на мерната опрема во теренската и аналитичката лабораторија, но посветено ќе работиме и на обезбедување стручно менторство и едукација на младите членови на тимот на „Технолаб“.   

МАРИЛИ: Како долгодишна успешна менаџерка, што ќе им порачате на младите високообразовани жени, но и воопшто на младите? Колку денес има можности за успешно претприемаштво во нашата земја, можности кои ќе им обезбедат на младите да останат дома и да не нема одлив на работна сила?

ТРАЈКОВСКА –ТРПЕВСКА: Во денешно време полно со предизвици но и со можности, сметам дека и понатаму образованието е клучно, но само доколку ги предизвика младите постојано да се надградуваат и да се охрабруваат да стекнуваат нови знаења за да можат да го следат брзиот технолошки развој. Според мене, клучна одлика на денешните млади е храброста да прифатат предизвици и истата треба креативно да ја користат при дефинирањето на личните и професионалните цели, да бидат упорни во остварувањето на своите визии, но притоа да бидат одговорни пред себе и пред околината.

Чинам дека трендот на одлив на работна сила во последно време оди во блага надолна линија. Младите од мојата околина носат одлуки да и дадат шанса прво на својата земја, пред веднаш да помислуваат на патување надвор во еден правец. Веројатно тоа се должи, делумно на зголемената потреба на државата за млади професионалци, но и на подготвеноста на многу компании соодветно да го вреднуваат и наградуваат трудот на своите млади соработници.

Долги години сум менаџерка и искуството ме научи дека  покрај стручните способности, неизбежно е да се учат и работи поврзани со менаџмент и лидерство, нешто без што не може да се развиете во сериозен бизнис-лидер. Нашата држава и и порано нудела - а сега тоа го прави успешно и отворено - пристојни услови за женско претприемаштво.

Разликите се само во тоа колку сме подготвени да ги ставиме на тест сопствените можности и таленти. Најтежок е првиот чекор, но ако се има визија, ако искрено се сака сопствената работа и ако сме доволно упорни, тогаш врвниот резултат е нешто што ќе следи само по себе.

Нормално, ниту еден успех не е содаден само од угорници, падовите се речиси неизбежни на моменти, но важно е секогаш да се стане и продолжи, особено кога е најтешко.

Погледот кој гледа напред никогаш нема да згреши, зашто токму таму се наоѓаат сите замислени цели и соништа.

Јас би им порачала на младите образовани жени (и не само жени) да се вооружат со силна мотивација, љубов и трпение во моментите кога ќе решат да се занимаваат со сопствен бизнис, а се друго ќе си дојде како последица на вложен труд, знаење и упорност. 

---

Статијата е прочитана 838 пати.

Сподели:

---